विष्णुरेव विजिज्ञास्यः सर्वकर्ताऽऽगमोदितः।
समन्वयादीक्षतेश्च पूर्णानन्दोऽन्तरः खवत्‌॥ २॥

प्रणेता ज्योतिरित्याद्यैः प्रसिद्धैरन्यवस्तुषु।
उच्यते विष्णुरेवैकः सर्वैः सर्वगुणत्वतः॥ ३॥

सर्वगोऽत्ता नियन्ता च दृश्यत्वाद्युज्झितः सदा।
विश्वजीवान्तरत्वाद्यैर्लिङ्गैः सर्वैर्युतः स हि॥ ४॥

सर्वाश्रयः पूर्णगुणः सोऽक्षरः सन्‌ हृदब्जगः।
सूर्यादिभासकः प्राणप्रेरको दैवतैरपि॥ ५॥

ज्ञेयो न वेदैः शूद्राद्यैः कम्पकोऽन्यश्च जीवतः।
पतित्वादिगुणैर्युक्तः तदन्यत्र च वाचकैः॥ ६॥

मुख्यतः सर्वशब्दैश्च वाच्य एको जनार्दनः।
अव्यक्तः कर्मवाच्यैश्च(कर्मवाक्यैश्च) वाच्य एकोऽमितात्मकः॥ ७॥

अवान्तरं कारणं च प्रकृतिः शून्यमेव च।
इत्याद्यन्यत्र नियतैरपि मुख्यतयोदितः।
शब्दैरतोऽनन्तगुणो यच्छब्दा योगवृत्तयः॥ ८॥