ब्रह्मसूत्रभाष्यम्/C02/S02/A019

असदधिकरणम्

शून्यवादमपाकरोति-

ॐ नासतोऽदृष्टत्वात् ॐ ॥ 26-199 ॥

अदृष्टत्वादसतः कारणत्वं न युज्यते ॥ 26 ॥

ॐ उदासीनानामपि चैवं सिद्धिः ॐ ॥ 27-200 ॥

असतः कारणत्वे उदासीनानां हेयोपादेयबुद्धिवर्जितानां खपुष्पादीनामपि सकाशात् कार्यसिद्धिः । चशब्दान्न चेदन्यत्रापि न स्यादविशेषात् ॥ 27 ॥

ॐ नाभाव उपलब्धेः ॐ ॥ 28-201 ॥

न च जगदेव शून्यमिति वाच्यम् । दृष्टत्वात् ॥28॥

ॐ वैधर्म्याच्च न स्वप्नादिवत् ॐ ॥ 29-202 ॥

न च दृष्टस्यापि स्वप्नादिवदभावः। तस्योत्तरकाले’स्वप्नोयं’,’नायं सर्पः’ इत्याद्यनुभवात् । न चात्र तादृशं प्रमाणमस्ति ॥ 29 ॥